نئی دہلی (این این آئی)بھارتی ریاست ہریانہ میں نامعلوم افراد نے امام مسجد اور ان کی معذور اہلیہ کو قتل کر دیا۔بھارتی میڈیا کے مطابق ہریانہ کے ضلع سونی پت کے علاقے ملک مجری میں مسجد کے امام عرفان اور ان کی اہلیہ یاسمین عرف مینا کی لاشیں گھر سے برآمد ہوئیں۔اہل علاقہ کے مطابق جب نمازی صبح نماز کے لیے مسجد میں گئے تو ملحقہ گھر میں دونوں کی لاشیں پڑی تھیں۔ایک عینی شاہد نے بتایا دونوں کو تیز دھار آلے کی مدد سے قتل کیا گیا، امام مسجد نے ایک سال قبل ہی شادی کی تھی اور ان کی کسی کے ساتھ کوئی دشمنی نہیں تھی۔رپورٹ کے مطابق گزشتہ روز دو گروپوں کے درمیان زمین کے تنازع پر جھگڑا ہوا تھا اور امام مسجد نے انہیں تنازع ختم کرنے کا کہا تھا جس پر ایک گروپ نے انہیں دھمکی دی تھی، ممکن ہے اسی گروپ کے افراد نے امام مسجد اور ان کی اہلیہ کو قتل کیا ہو۔پولیس کے مطابق واقعہ کے شواہد اکٹھے کر لیے اور پوسٹ مارٹم رپورٹ بھی آ چکی ہے ،مقدمہ درج کر کے تحقیقات کا آغاز کر دیا گیا ہے ۔