کابل، دوحہ، جینوا(نیٹ نیوز، صباح نیوز ،این این آئی) افغانستان کے دارالحکومت کابل مسلسل دوسرے روز بھی دھماکوں کی زد میں رہا،اتوارکو ہونے والے دو دھماکوں میں 7 افراد زخمی ہوگئے جن میں 4 فوجی افسران بھی شامل ہیں۔پہلا دھماکا ایئرپورٹ کے راستے پر ہوا جہاں افغان آرمی کی گاڑی کو بارودی سرنگ کے دھماکے میں نشانہ بنایا گیا۔ گاڑی میں موجود چاروں افسران شدید زخمی ہوگئے جن میں سے 2 کی حالت نازک ہے ۔دوسرا دھماکا صبح 6 بجے ہوا جس میں ایک شہری کی گاڑی کو مقناطیسی بارودی سرنگ سے نشانہ بنایا گیا۔دریں اثناافغانستان کیلئے دو روزہ ڈونر کانفرنس آج پیر سے جنیوا میں شروع ہوگی۔ برسلز میں یورپی یونین نے بتایا کہ افغانستان میں ترقی اور جمہوریت پوری دنیا کے مفاد میں ہے ۔ دوسری طرف امریکی وزیرخارجہ مائیک پومپیو نے کہا ہے کہ افغان حکومت اور طالبان امن عمل کو آگے بڑھائیں۔ پومپیو نے فریقین پر زور دیا کہ تشدد میں کمی کی جائے ، افغان تنازع کے سیاسی حل کیلئے ایک روڈ میپ تشکیل دیا جائے اور پائیدار جنگ بندی معاہدے کیلئے کوششیں بڑھائی جائیں۔