اسلام آباد(خصوصی نیوز رپورٹر، نیوز ایجنسیاں ) وفاقی ادارہ شماریات کے مطابق شوکت ترین کے بطور وزیرخزانہ 6 ماہ کے عرصے میں ملک بھر میں اشیائے ضروریہ کی قیمتوں میں ہوشربا اضافہ ہوا۔ ادارہ شماریات کی رپورٹ میں بتایا گیا ہے کہ شوکت ترین کی بطور وفاقی وزیر خزانہ 6 ماہ کی مدت مکمل ہوگئی ہے اور اس عرصے میں اشیائے ضروریہ کی قیمتوں میں ہوشربا اضافہ ہوا۔ادارہ شماریات کی دستاویز کے مطابق 6 ماہ کے عرصے میں آٹے کا 20 کلو کا تھیلا اوسط 210 روپے 5 پیسے مہنگا ہوا، چینی کی فی کلو قیمت میں اوسط 3 روپے 23 پیسے اضافہ ہوا، گھی کی قیمت 6 ماہ میں فی کلو 46 روپے 73 پیسے بڑھی، مٹن 101 روپے 7 پیسے ، بیف 62 روپے 2 پیسے فی کلو مہنگا ہوا۔ دہی کی فی کلو قیمت میں 5 روپے 19 پیسے کا اضافہ ہوا، دال مسور25 روپے 74 پیسے فی کلو مہنگی ہوئی، حالیہ 6 ماہ میں انڈے کی قیمتوں میں بھی اضافہ ہوا۔ پیاز 16 روپے 27 پیسے ، ٹماٹر 11 روپے 38 پیسے ، آلو 7 روپے 59 پیسے فی کلو اور لہسن کی فی کلو قیمت میں 102 روپے 54 پیسے اضافہ ہوا، ایل پی جی کا گھریلو سلنڈر 802 روپے 5 پیسے مہنگا ہوا،گڑ کی فی کلو قیمت 17 روپے 24 پیسے بڑھی، تازہ دودھ کی فی لیٹر قیمت میں4 روپے 55 پیسے اضافہ ہوا۔ادارہ شماریات کے مطابق 6 ماہ کے عرصے میں دال مونگ 65 روپے 23 پیسے ، دال ماش 16روپے 86 پیسے کلو سستی ہوئی، دال چنا کی فی کلو قیمت2 روپے 8 پیسے کم ہوئی جبکہ زندہ مرغی فی کلو 7 روپے 32 پیسے سستی ہوئی۔واضح رہے وزیر اعظم عمران خان نے شوکت ترین کو بطور وزیر خزانہ مہنگائی کو کنٹرول کرنے کا ٹاسک دیا تھا، حکومتی ارکان نے حفیظ شیخ کی وزیر خزانہ کے عہدے سے ہٹانے کی وجہ مہنگائی قرار دی تھی۔