شیرانی میں آپریشن ،4 دہشتگرد ہلاک، اسلحہ ،گولہ بارود برآمد

کوئٹہ(این این آئی) بلوچستان کے ضلع شیرانی میں سکیورٹی فورسز کی کاروائی میں چار دہشتگرد ہلاک ہوگئے ۔ سکیورٹی فورسز ذرائع کے مطابق 29اور 30نومبر کو بلوچستان کے ضلع شیرانی کے علاقے مغل کوٹ میں دہشتگردوں کی نقل و حرکت کی اطلاع پر سکیورٹی فورسز نے علاقے کو گھیرے میں لیکر کارروائی کا آغاز کیا تو علاقے میں موجود دہشتگردوں نے سیکورٹی فورسز پر فائرنگ شروع کردی ۔ فورسز کی جوابی کاروائی میں 4دہشتگرد ہلاک جبکہ ان کے متعدد ساتھی فرار ہوگئے ۔سیکورٹی فورسز کے مطابق ہلاک ہونے والے دہشتگردوں کے قبضے سے 4ایس ایم جی، 3گرینیڈ ، 1راکٹ لانچر، دستانے ، اشیاء خورد ونوش سمیت دیگر سامان برآمد کرلیا گیا ۔ سکیورٹی فورسز کے مطابق ہلاک ہونے والے دہشتگردوں کی شناخت کا عمل جبکہ فرار ہونے والے دہشتگردوں کی تلاش جاری ہے ۔سکیورٹی فورسز نے شبہ ظاہر کیا ہے کہ ہلاک ہونے والوں کا تعلق کالعدم فتنہ الخوارج سے ہے ۔