فیض حمید کا کورٹ مارشل، سپریم کورٹ بار کا خیر مقدم

اسلام آباد(صباح نیوز)سپریم کورٹ بار ایسوسی ایشن نے لیفٹیننٹ جنرل(ر) فیض حمید کے کورٹ مارشل کا خیر مقدم کیا ہے ۔سپریم کورٹ بار ایسوسی ایشن کے صدر میاں روف عطا نے اپنے بیان میں کہا ہے کہ سپریم کورٹ بار ایسوسی ایشن لیفٹیننٹ جنرل ریٹائرڈ فیض حمید کے مواخذے کا خیرمقدم کرتی ہے ، یہ ادارہ جاتی خود شناسی کی طرف ایک اہم قدم ہے ۔میاں روف عطا کا کہنا ہے کہ فیض حمید کا کورٹ مارشل ظاہر کرتا ہے کہ مقدس گائے کے تصور کو اب ختم کر دیا گیا ہے ، اختیارات کا غلط استعمال کرنے والے تمام افراد کا احتساب کیا جائے ۔ان کا کہنا ہے کہ ان افراد نے اپنے اقدامات سے سرکاری خزانے پر بھی اضافی بوجھ ڈالا ہے ، ایسے افراد نے اداروں کی ساکھ کو داغدار کیا، ادارے اور عوام کے درمیان دوری پیدا کی، ان افراد نے نہ صرف اپنے ادارے کے قوانین بلکہ اپنے آئینی مینڈیٹ سے بھی تجاوز کیا ہے ۔انہوں نے کہا کہ تمام اداروں کے کے لیے ضروری ہے کہ وہ آئینی حدود میں کام کریں،ان افراد کے خلاف کارروائی کا آغاز اداروں پر عوام کا اعتماد بحال کرنے کی جانب ایک مثبت قدم ہے ۔ان کا کہنا ہے کہ سپریم کورٹ بار جمہوری اقدار، آئین پرستی، سویلین اور ادارہ جاتی فریم ورک کی بالادستی کی حمایت جاری رکھے گی۔