ریما خان پر کروڑوں کے فراڈ کا الزام
لاہور (این این آئی)پاکستانی فلم انڈسٹری کی معروف اداکارہ ریما خان ایک بار پھر خبروں کی زینت بن گئی ہیں، اس بار ایک غیر معروف فلمساز شاہد رفیق کی جانب سے ان پر فراڈ کے الزامات عائد کئے گئے ہیں جس کی ویڈیو سوشل میڈیا پر وائرل ہو رہی ہے ۔قطر میں ملازمت کرنے والے شاہد رفیق نے دعویٰ کیا ہے کہ انہوں نے ریما خان کی فلم ’لو میں گم‘ میں سرمایہ کاری کی تھی تاہم ان کے ساتھ ریما کی جانب سے کروڑوں کا فراڈ کیا گیا ہے ۔ شاہد رفیق کے مطابق، 2009 میں وہ قطر سے لاہور واپس آئے تاکہ پراپرٹی خرید سکیں۔ اس دوران ان کی ملاقات ریما خان کی بہن، مائرہ خان سے ہوئی، جو ریئل اسٹیٹ کے کاروبار سے وابستہ تھیں۔ مائرہ نے انہیں فلم میں سرمایہ کاری کا مشورہ دیا اور منافع کی یقین دہانی کرائی۔شاہد کا کہنا ہے کہ مائرہ نے ان کی ریما خان سے ملاقات بھی کرائی جس کے بعد پیسے منتقل کئے ۔ تاہم مائرہ نے انہیں پلاٹس فروخت کرنے سے انکار کرتے ہوئے مزید رقم کا مطالبہ کیا۔ سرمایہ کار نے دعویٰ کیا کہ اب ان کا کیس زیر سماعت ہے اور گزشتہ چار سال سے ریما خان پیش نہیں ہو رہیں اور ہر بار عدالت میں سماعت کو ملتوی کرنے کی درخواست دائر کردیتی ہیں۔