اسلام آباد (اے پی پی)صدر مملکت ڈاکٹر عارف علوی نے کہا ہے کہ بھارت پاکستان کے خلاف ہائبرڈ جنگ میں ملوثہے اور اس مقصد کے لئے افغانستان کی سرزمین بھی استعمال کررہا ہے ، افغان جنگ کے پاکستان پر گہرے اثرات مرتب ہوئے ، سی پیک سے بلوچستان میں ترقی کی نئی راہیں کھلیں گی اور علاقائی تجارت کو فروغ ملے گا۔ وہ بدھ کو یہاں بلوچستان پر نیشنل ورکشاپ کے شرکاسے خطاب کر رہے تھے ۔ صدر مملکت نے کہا وسطی ایشیائی ممالک کو اپنی تجارت کے فروغ کیلئے پاکستان کے راستے بحیرہ عرب تک رسائی ملے گی، بلوچستان میں ماہی گیری کے شعبے سے زرمبادلہ کمانے کی بڑی صلاحیت موجود ہے ، بلوچستان کے ماہی گیری کے شعبے کو جدید اور پائیدار بنیادوں پر استوار کرنے کی ضرورت ہے ۔ صدر ڈاکٹر عارف علوی نے کہا کہ دہشتگردی کے خلاف طویل جنگ سے پاکستان کی معاشی اور سکیورٹی صورتحال پر گہرے اثرات پڑے ۔ صدر مملکت نے کہا کہ طالبان کو افغانستان میں مفاہمت اور مصالحت کی پالیسی اپنانی چاہئے ۔