لندن(این این آئی)پاکستان کی ہونہار بیٹی رائنہ خان نے برطانیہ کا’’دی لیڈی ڈیانا ایوارڈ‘‘ اپنے نام کرلیا، لاہور کی رائنہ خان خط غربت کی لکیر سے نیچے زندگی گزارنے والے طبقے کے بچوں اور خواتین کو تعلیم دے کر ایوارڈ کی حق دار قرار پائیں۔ 18 سالہ اے لیول کی طالبہ رائنہ خان معروف گلوکار عدیل برکی کی بیٹی ہیں، انہیں سماجی خدمات کے اعتراف میں ایک غیر سرکاری برطانوی تنظیم کی جانب سے ایوارڈ دیا گیا ہے ۔ یہ ایوارڈ ہر سال برطانیہ کی سابق شہزادی لیڈی ڈیانا کی سالگرہ پر دیا جاتا ہے ۔رائنہ خان کے مطابق انہوں نے 2017 میں گھریلو ملازمہ کے بچوں کو پڑھانا شروع کیا اور ایک این جی او کی بنیاد رکھی۔2 سال میں فنڈز اکٹھے کرکے ایک سکول بنایا جہاں 250 طلبا و طالبات مفت تعلیم حاصل کر رہے ہیں جبکہ سکول میں لڑکیوں کو سلائی کڑھائی کا کام بھی سکھایا جاتا ہے ۔رائنہ خان کا کہنا ہے کہ ملک بھر میں تعلیم عام کرنا ان کا خواب ہے ، وہ اس مقصد کے لیے اپنی کوشش جاری رکھیں گی۔