واشنگٹن( نیٹ نیوز) امریکہ کی بڑی سافٹ ویئر کمپنی ایڈوبی انکارپوریٹڈ کے شریک موجد چارلزچک گیشکی81کی عمر میں چل بسے ۔ انہوں نے پورٹیبل ڈاکیومنٹ فارمیٹ (پی ڈی ایف) کی تیاری میں مدد کی تھی۔چارلز گیشکی کی پہلی اہم پروڈکٹ ایڈوبی پوسٹ سکرپٹ تھی جس نے ٹیکسٹ اور تصاویر کاغذ پر چھاپنے میں انقلابی پیش رفت کا آغاز کیا اور ڈیسک ٹاپ پبلشنگ میں انقلاب کی شروعات ہوئی۔ غیر ملکی میڈیا رپورٹس کے مطابق گیشکی خلیج سان فرانسسکو کے نواحی علاقے لاس الٹس میں رہائش پذیر تھے ، وہ گزشتہ روز حرکت قلب بند ہوجانے کے باعث انتقال کرگئے ۔کمپنی کے چیف ایگزیکٹو افسر شنتنونرائن نے کمپنی کے ملازمین کو کی گئی ای میل میں کہا ہے کہ یہ پوری ایڈوبی برادری اور ٹیکنالوجی کی صنعت کے لیے بڑا نقصان ہے ۔ گیشکی کی اہلیہ 78سالہ نینسی نے میڈیا کو بتایا کہ وہ اپنے آپ کو ہمیشہ دنیا کا خوش قسمت ترین شخص کہتے تھے ۔