نیویارک( ویب ڈیسک) 1918 میں فلو جیسی ایک وبا دنیا میں پھیلی تھی جس نے 5 کروڑ انسانی جانیں نگل لی تھیں۔ اب ورلڈ ہیلتھ آرگنائزیشن کے سابق سربراہ نے اس سے بھی خوفناک وبا پھیلنے کی وارننگ دے دی ہے ۔ اس کے بارے میں بتاتے ہوئے انہوں نے کہا ہے کہ یہ اس قدر خوفناک ہوگی کہ دنوں میں 8 کروڑ سے زائد لوگوں کو لقمہ اجل بنا ڈالے گی۔ یہ وبا بھی فلو کی طرح ہوگی جو ورلڈ ہیلتھ آرگنائزیشن کے سابق سربراہ کے مطابق محض 36 گھنٹوں میں پوری دنیا میں پھیل جائے گی۔ ورلڈ ہیلتھ آرگنائزیشن کے سابق سربراہ کی قیادت میں ’’دی گلوبل پری پیریشن مانیٹرنگ بورڈ‘‘کے ماہرین نے ایک رپورٹ تیار کی ہے جس میں یہ خوفناک انکشافات کئے گئے ہیں۔ اس رپورٹ میں بتایا گیا ہے کہ لگ بھگ ایک صدی قبل اسپینش فلو پینڈیمک نے ایک تہائی دنیا کو اپنی لپیٹ میں لے لیا تھا اور 5 کروڑ لوگ موت کے گھاٹ اتر گئے تھے ۔ اب یہ نئی بیماری اس سے کہیں زیادہ تیزی کے ساتھ دنیا میں پھیل سکتی ہے اور اس سے زیادہ لوگ اس کے باعث موت کے منہ میں جانے کا امکان ہے ۔ اس گروپ نے اپنی اے ورلڈ ایٹ رسک (A world at risk)نامی رپورٹ میں مزید بتایا ہے کہ یہ خطرہ فرضی نہیں، حقیقی ہے اور دنیا کو اسے انتہائی سنجیدگی سے لینا ہوگا۔ یہ وبا پھیلی تو کم از کم 8 کروڑ سے زائد لوگ مر جائیں گے اور دنیا کی معیشت تباہ ہو جائے گی۔