اسلام آباد(آن لائن)وزیراعظم عمران خان نے کہا ہے کہ پاکستان خطے اور دنیا کے امن کے لئے تمام تر کوششوں میں مدد فراہم کرتا رہے گا۔ جاری اعلامیے کے مطابق وزیر اعظم عمران خان نے دورہ سعودی عرب کے دوران مشرق وسطیٰ کے تنازعات کو سیاسی اور سفارتی ذرائع سے حل کرنے پر زوردیا ۔اعلامیے میں کہا گیا ہے کہ یہ دورہ دونوں ممالک کی قیادت کے درمیان مختلف امور پر مشاورت کا تسلسل تھا جس میں دونوں ممالک کے سربراہان کے درمیان باہمی اور خطہ کے امور پر تفصیلی بات ہوئی۔وزیراعظم نے دونوں ممالک کے درمیان سٹریٹجک تعلقات کی اہمیت پر زور دیتے ہوئے کہا پاک سعودی تعلقات خطہ میں امن و استحکام اور ترقی کے ضامن ہیں۔مشترکہ اعلامیے میں بتایا گیا ہے کہ دونوں ممالک کی قیادت پاکستان سعودی تعلقات کو ایک نئی سطح پر لے جانے کے لئے پرعزم ہے ۔ملاقات میں او آئی سی اور دیگر ذرائع سے کشمیر کاز کو آگے بڑھانے پر تبادلہ خیال کیا گیا۔وزیر اعظم عمران خان نے سعودی ولی عہد کو مقبوضہ کشمیر کی تازہ ترین صورتحال اور لائن آف کنٹرول پر بھارت کے متشدد اقدامات سے آگاہ کیا اور مسئلہ کشمیر پر حمایت کرنے پر سعودی عرب کا شکریہ ادا کیا۔انہوں نے مزید کہا تنازعات اور اختلافات کو سیاسی اور سفارتی ذرائع سے حل کیا جائے ، پاکستان خطے میں امن کے لئے تمام ترکوششوں میں مدد فراہم کرتا رہے گا۔اعلامیے کے مطابق سعودی عرب کے ولی عہد نے پاکستان میں سیاحت کی ترقی میں ہر ممکن تعاون پر اتفاق کیا اور کہا کہ سیاحت میں تعاون کے لئے سعودی ٹیم جلد ہی پاکستان کا دورہ کرے گی، پاک سعودی تعلقات کو ایک نئی سطح پر لے جانے کے لئے پرعزم ہیں۔وزیر اعظم عمران خان نے جی 20 کی صدارت ملنے پر سعودی ولی عہد کو مبارکباد دی۔واضح رہے کہ مئی 2019ء کے بعد وزیراعظم عمران خان کا سعودی عرب کا یہ چوتھا دورہ تھا۔