کراچی(نیٹ نیوز ) اداکارہ مہوش حیات نے پاکستان مخالف کینیڈین صحافی طارق فتح کو پاکستانی پولیوورکرز کی غلط عکاسی کرکے پاکستان کا نام بدنام کرنے پر آڑے ہاتھوں لیتے ہوئے کھری کھری سنائی ہیں۔پاکستان مخالف کینیڈین صحافی طارق فتح نے گزشتہ روز اپنے ٹوئٹر اکاؤنٹ پر ایک ویڈیو شیئر کرائی تھی جس میں ایک خاتون دو خواتین پولیو ورکرز پر چلاتے ہوئے کہہ رہی تھی کہ وہ اپنے بچوں کو پولیو کے قطرے نہیں پلائے گی کیونکہ پولیو کے قطرے پینے سے اس کے بچے بیمار ہوجاتے ہیں بعد ازاں اس خاتون نے پولیو ورکرز کے منہ پر دروازہ بندکردیا تھا۔یہ ویڈیو شیئر کراتے ہوئے طارق نے پاکستانی خواتین کو طنز کا نشانہ بناتے ہوئے لکھا کہ ایک پاکستانی ماں نہ صرف دو خواتین پولیو ورکر پر چلائی بلکہ ان کے منہ پر دروازہ بھی بند کردیا۔اداکارہ مہوش حیات نے طارق کو آئینہ دکھاتے ہوئے کہا آپ کی فکرمندی کا شکریہ لیکن سب سے پہلے سوشل میڈیا پر اگلی بار کچھ بھی پوسٹ کرنے سے قبل اپنے ذرائع کی تصدیق کرلیں۔ کیونکہ درحقیقت یہ میری فلم ’’لوڈ ویڈنگ‘‘ کا ایک سین ہے اور اس میں موجود پولیو ورکر میں خود ہوں جب کہ جو خاتون چلارہی ہے وہ بھی ایک اداکارہ ہے ۔