سرینگر(نیٹ نیوز،کے پی آئی ) مقبوضہ کشمیرمیں بھارت نے ریاستی دہشتگردی کا مظاہرہ کرتے ہوئے 3 نوجوانوں کوشہید کردیا۔سرینگر میں لوگوں کو نماز جمعہ کی ادائیگی سے روک دیا گیا۔شدید برفباری میں کریک ڈائون جاری ہے مزید 7افراد گرفتارکرلئے گئے ،شوپیاں اورقریبی علاقوں کا محاصرہ کیا گیا ہے جبکہ موبائل،انٹرنیٹ سروس بند ہے ،کشمیری میڈیا کے مطابق قابض بھارتی فورسزنے ایک بارپھرریاستی دہشتگردی کا مظاہرہ کرتے ہوئے شوپیاں میں 3نوجوانوں کوشہید کردیا دونوں نوجوانوں کوگھرگھرتلاشی کے دوران شہید کیا گیا۔بھارتی فورسزنے شوپیاں اورقریبی علاقوں کا محاصرہ کرلیا۔ ان علاقوں میں انٹرنیٹ اورموبائل سروس بند کردی گئی۔دوسری جانب سری نگرمیں لوگوں کوجامع مسجد میں نماز جمعہ کی ادائیگی سے روکنے کے لئے مسجد کے اطراف کی سڑکوں کوخاردارتارلگا کربند کردیا گیا اوربھارتی فورسزکی اضافی نفری تعینات کردی گئی۔ کے پی آئی کے مطابق وادی میں قابض افواج نے کریک ڈاون کے دوران سات کشمیری نوجوان گرفتار کرلئے ،کے پی آئی کے مطابق قابض فوجیوں نے جمعہ کو دو نوجوانوں کو ضلع کے علاقے امشی پورہ میں محاصرے اور تلاشی کی ایک کارروائی کے دوران شہید کیا۔ بھارتی فوجیوں نے علاقے کی طرف آنے اورجانے والے تمام راستوں کو بند کردیا اور گھرگھر تلاشی لی۔ آخری اطلاعات آنے تک علاقے میں فوجی آپریشن جاری تھا۔قابض حکام نے علاقے میں انٹرنیٹ سروس بھی معطل کردی ،بھارتی فو ج نے دعوی کیا ہے کہ خفیہ اطلاع ملنے کے بعد سکیورٹی فورسز نے علاقے کا محاصرہ کر لیا۔ اور وہاں تلاشی مہم شروع کی، جس دوران فائرنگ کا تبادلہ بھی ہوا۔علاو ہ ازیں قابض فوج نے وادی میں برفباری کے باوجود مختلف مقامات پر کریک ڈاون کاسلسلہ جاری رکھا اس دوران جموں و کشمیر میں بھارتی فوجیوں نے بڈگام، بارہمولہ اور کشتواڑ اضلاع سے سات نوجوانوں کو گرفتار کر لیا۔بھارتی فوجیوں نے محاصرے اور تلاشی کی کارروائیوں کے دوران بڈگام کے علاقے آرتھ میں دو نوجوانوں کو اور ضلع بارہمولہ میں ایک نوجوان کو گرفتار کیا۔بھارتی فوجیوں نے ایک اور محاصرے اور تلاشی کی کارروائی میں ضلع کشتواڑ کے علاقے ڈول دھر میں چار نوجوانوں کو گرفتار کر لیا۔رپورٹس میں بتایا گیا کہ فوجیوں نے انہیں مختلف تفتیشی مراکز میں منتقل کردیا۔