اسلام آباد (سپیشل رپورٹر، مانیٹرنگ ڈیسک ) وزیراعظم عمران خان نے 14 ویں انٹرنیشنل چیمبرز کے افتتاحی اجلاس سے خطاب کرتے ہوئے کہا ہے کہ پاکستان اب بھی سستا ملک ہے ، مہنگائی عالمی مسئلہ ہے ، منی بجٹ کا عام آدمی پر کوئی اثر نہیں پڑے گا۔ وزیراعظم نے کہا انڈسٹری لگانے کیلئے زمین بہت مہنگی ہوتی ہے ، ہم انڈسٹری لگانے کیلئے زمین لیزپرفراہم کرینگے ، صنعتیں لگانے کیلئے سرکاری اراضی لیزپردینے کا فیصلہ کیا ہے ،کوشش کر رہا ہوں مدینہ کی ریاست لوگوں کی زندگیوں میں آجائے ۔انہوں نے کہا جب معاشرے میں قانون کی بالادستی نہ ہو تو کرپشن بڑھتی ہے ،ہماری جنگ پاکستان میں قانون کی بالادستی قائم کرنا ہے ، یہ پاکستان کے مستقبل کی جنگ ہے ، بنانا ری پبلک میں انصاف نہیں ہوتا، کرپشن کی وجہ سے رنگ روڈ منصوبہ تاخیرکا شکارہوا، ملک میں مہنگائی کی وجہ سے لوگ تکلیف میں ہیں، اس وقت پوری دنیا کا یہ مسئلہ ہے ،برطانوی پارلیمنٹ میں بورس جانسن پر گیس کی قیمتیں بڑھنے پر تنقید ہو رہی ہے ، ملک میں آئل، پٹرولیم مصنوعات کی قیمتیں بڑھی، لوگ تکلیف میں ہیں، پاکستان میں ابھی پٹرول کی قیمتیں بھارت،بنگلادیش سے سستی ہیں، کسی بھی حکومت کو اتنا بڑا خسارہ نہیں ملا تھا،سعودی عرب، چین مدد نہ کرتے تو پاکستان دیوالیہ ہو چکا ہوتا، معاشی حالات بہتر ہوئے تو صدی کا بڑا کرائسز کورونا آ گیا تھا، پاکستان نے کورونا کے دوران بہترین پالیسی اپنائی اور مشکل فیصلے کئے جو ہم نے مشکل فیصلے کئے ، آج وہی برطانیہ میں بورس جانسن کر رہا ہے ، کورونا کے دوران مجھ پربڑی تنقید کی گئی تھی، کورونا کے بعد پھرافغانستان کا کرائسزآگیا، پاکستان سے ڈالرافغانستان جانا شروع ہوگیا۔انہوں نے کہا ہم پیاز، ٹماٹر بیچ کر خوشحال نہیں ہوسکتے ، کورونا کے باوجود لارج سکیل مینو فیکچرنگ میں 15 فیصد اضافہ ہوا، ہماری حکومت کو نااہل کہا جاتا ہے ، حکومت نے ملک کو کورونا،بے روزگاری سے بچایا، کنسٹرکشن سیکٹراس وقت بوم کررہا ہے ،ایگری کلچر میں 1100 ارب کسانوں نے کمائے ، موٹرسا ئیکل کی ریکارڈ فروخت ہورہی ہے ۔ انہوں نے کہا کرپشن کی جنگ صرف میں نے نہیں پورے معاشرے نے جنگ لڑنی ہے ، میں تواسے جہاد سمجھتا ہوں، میں ہر روز یہ جنگ لڑتا ہوں، مافیازنے افراتفری پھیلائی ہوئی ہے ، یہ ہو گیا، وہ ہو گیا۔انہوں نے کہا اگرایکسپورٹ نہیں بڑھے گی تو پھرآئی ایم ایف کے پاس جانا پڑے گا۔